ပြည်သူတွေအနေနဲ့ မိမိတို့ရဲ့ အသက်အိုးအိမ်စည်းစိမ်တွေကို သဘာဝဘေးကြောင့်ထိခိုက်မှုလျော့ပါးနိုင်ရေးအတွက် မိုးလေ၀သနှင့်ဇလဗေဒညွှန်ကြားမှုဦးစီးဌာနက ထုတ်ပြန်တဲ့ မိုးလေ၀သနှင့်ဇလဗေဒခန့်မှန်းချက်၊သတိပေးချက်များကို အလေးထားဆောင်ရွက်ကြဖို့ လိုအပ်တယ်လို့ ပို့ဆောင်ရေးနှင့်ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးသန့်စင်မောင်က မတ်လ၂၃ရက်ကနေပြည်တော်မှာရှိတဲ့ သင်္ဂဟဟိုတယ်မှာ ပြုလုပ်ခဲ့တဲ့ ကမ္ဘာမိုးလေ၀သနေ့ အခမ်းအနားမှာ ပြောကြားခဲ့ပါတယ်။မိုးလေ၀သဆိုတာလူတိုင်းနဲ့သက်ဆိုင်ပြီး အရေးကြီးပါတယ်။ ပြည်သူတွေအနေနဲ့ ခရီးသွားလာရာမှာ အန္တရာယ်ကင်းအောင်၊မိမိတိုရဲ့စိုက်ပျိုးသီးနှံတွေ မပျက်စီးမဆုံးရှုံးစေရေးတို့အတွက် မိုးလေ၀သနှင့်ဇလဗေဒခန့်မှန်းချက်၊သတိပေးချက်များကို အလေးထားဆောင်ရွက်ကြဖို့လိုအပ်ပါတယ်။ မိုးလေ၀သနှင့် ဇလ ဗေဒညွှန်ကြားမှုဦးစီးဌာန အနေနဲ့  မိုးလေ၀သနှင့် ဇလဗေဒခန့်မှန်းချက်၊သတိပေးချက်များကို မှန်နိုင်သမျှ မှန်အောင်နဲ့ တိကျနိုင်သမျှ တိကျအောင်ဆောင်ရွက်ပြီး အချိန်မီသတင်းထုတ်ပြန်နိုင်ဖို့အတွက်လည်း လိုအပ်တယ်လို့ ပို့ဆောင်ရေးနှင့်ဆက်သွယ်ရေးဝန်ကြီးဌာန ပြည်ထောင်စုဝန်ကြီးကပြောပါတယ်။

မိုးလေ၀သနှင့်ဇလဗေဒညွှန်ကြားမှုဦးစီးဌာန အနေနဲ့လည်း မိုးလေ၀သနှင့်ဇလဗေဒခန့်မှန်းချက်၊သတိပေးချက်များကို မှန်မှန်ကန်ကန်ထုတ်ပြန်နိုင်ရေးအတွက် ဂျပန်နိုင်ငံအစိုးရရဲ့ ထောက်ပံ့ကူညီမှုနဲ့ မိုးလေ၀သ ရေဒါ (၃)လုံးကို ကျောက်ဖြူ၊မန္တလေးနဲ့ရန်ကုန်မြို့တို့မှာ တည်ဆောက်ထားပြီးဖြစ်တယ်လို့သိရပါတယ်။ ဒါ့အပြင် လက်ရှိဖြစ်ပေါ်နေတဲ့ မိုးလေ၀သအခြေအနေများကို အချိန်နှင့်တစ်ပြေးညီတိုင်းထွာ သိရှိနိုင်စေရေးအတွက် အလိုအလျောက် မိုးလေ၀သတိုင်းထွာရေးစနစ်များကို အဆင့်မြှင့်တင်တပ်ဆင်လျက်ရှိတယ်လို့ သိရပါတယ်။ ကမ္ဘာမိုးလေ၀သနေ့အဖြစ် နှစ်စဉ်မတ်လ၂၃ရက်ကို သတ်မှတ်ထားပြီး ၁၉၆၁ ခုနှစ်ကစတင်ကာ နှစ်စဉ်ကျင်းပလာခဲ့ပြီး အခုနှစ်မှာတော့(၅၉)နှစ်ပြည့်မြောက်ခဲ့ပြီလို့ သိရပါတယ်။ ယခုလိုအခမ်းအနားကို ကမ္ဘာမိုးလေ၀သအဖွဲ့ချုပ် အဖွဲ့ဝင်နိုင်ငံပေါင်း(၁၉၁)နိုင်ငံလုံးမှာ ပြုလုပ်ခဲ့တယ်လို့ သိရပါတယ်။

 

 

Related News