၂၀၁၉ ခုနှစ်ကြားဖြတ် လူဦးရေသန်းခေါင်စာရင်း ကောက်ယူနိုင်ရေးအတွက် မြေပုံများကို update ပြုလုပ်ခြင်းများ ဆောင်ရွက်ရာ မှာ နေပြည်တော်အပါအ၀င် တိုင်းဒေသကြီးနှင့် ပြည်နယ်(၅)ခုမှာ ဆောင်ရွက်ပြီးစီးသွားပြီလို့ အလုပ်သမား၊ လူဝင်မှုကြီးကြပ်ရေး နှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေက ဇွန်လ(၂၅)ရက်က နေပြည်တော် သင်္ဂဟဟိုတယ်မှာ ပြုလုပ်ခဲ့တဲ့  ၂၀၁၉ ခုနှစ်ကြားဖြတ် လူဦးရေသန်းခေါင်စာရင်း ကောက်ယူရေးအတွက် အသုံးပြုမည့်မေးခွန်းပုံစံတွင် ထည့်သွင်း ဖော်ပြနိုင်ရေးအတွက် အချက်အလက် အသုံးပြုသူများ အလုပ်ရုံဆွေးနွေးပွဲမှာ ပြောကြားခဲ့ပါတယ်။၂၀၁၉ခုနှစ်ကြားဖြတ်လူဦးရေသန်းခေါင်စာရင်း ကောက်ယူနိုင်ရေးအတွက် နမူနာကောက်ကွက် ရွေးချယ်ခြင်းနဲ့ ကောက်ကွက် အရွယ်အစားသတ်မှတ်ခြင်းတို့ ဆောင်ရွက်ခဲ့ပြီးဖြစ်ပါတယ်။

ဒါကြောင့် ကြားဖြတ်သန်းခေါင်စာရင်း ကောက်ယူသွားမယ့် စာရင်း ကောက်ကွက်(၄၀၀၀)ကျော်အတွက် မြေပုံများကို Update ပြုလုပ်ခြင်းတွေ ဆောင်ရွက်နေတာဖြစ်ပြီး လက်ရှိအချိန်မှာ နေပြည်တော်ကောင်စီနယ်မြေ၊ ဧရာဝတီတိုင်းဒေသကြီး၊ တနသာင်္ရီ တိုင်းဒေသကြီး၊ ချင်းပြည်နယ်နဲ့ ကရင်ပြည်နယ်တို့မှာ ဆောင်ရွက်ပြီးစီးသွားပြီလို့ အလုပ်သမား၊  လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေက ပြောပါတယ်။၂၀၁၉ ခုနှစ် ကြားဖြတ်လူဦးရေသန်းခေါင်စာရင်းကို ကောက်ယူရာမှာ ၂၀၁၄ ခုနှစ်၊ ပြည်လုံးကျွတ် သန်းခေါင်စာရင်း ကောက်ယူ စဉ်ကလို မေးခွန်းစာရွက်များနှင့် Manual ကောက်ယူခြင်းမျိုး မဟုတ်ဘဲ Mobile Tablets များအသုံးပြုကာ ကွန်ပျူတာအခြေပြု လူတစ်ဦးချင်း အင်တာဗျုးသည့်စနစ် (Computer Assisted Personal Interviewing-CAPI) နည်းပညာကို အသုံးပြု ကောက်ယူသွားမယ်လို့ သိရပါတယ်။လူဦးရေနှင့် အိမ်အကြောင်းအရာ သန်ခေါင်စာရင်းများကို ပုံမှန်အားဖြင့် (၁၀)နှစ်လျှင်တစ်ကြိမ်နှုန်း ကောက်ယူလေ့ရှိပြီး ကြားဖြတ်သန်းခေါင်စာရင်းတွေကိုတော့ ၅နှစ်လျှင် တစ်ကြိမ်နှုန်း ကောက်ယူသွားဖို့ ရှိတယ်လို့ သိရပါတယ်။ မြန်မာနိုင်ငံအနေနဲ့ ၂၀၁၄ ခုနှစ်က ကောက်ယူထားပြီးဖြစ်တာကြောင့် လာမည့်(၂၀၂၄) ခုနှစ်မှာ တစ်နိုင်ငံလုံး အတိုင်းအတာနဲ့ ထပ်မံကောက်ယူ သွားဖို့ ရှိတယ်လို့ သိရပါတယ်။

 

 

Related News