ပြည်သူ့ကိုယ်စားလှယ်များဖြစ်တဲ့ လွှတ်တော်ကိုယ်စားလှယ်တွေအနေနဲ့ ပြည်တွင်း ငြိမ်းချမ်းရေး ရရှိနိုင်ဖို့ရာအတွက် ပြည်သူများနဲ့အတူ ကျရာအခန်းကဏ္ဍမှာ ပါဝင်ဆောင်ရွက်ဖို့ လိုအပ်လာပြီလို့ ပြည်သူ့လွှတ်တော်ဥက္ကဋ္ဌ ဦးတီခွန်မြတ်က ဇူလိုင်လ(၁၅)ရက်ကပြုလုပ်ခဲ့တဲ့ ဒုတိယအကြိမ် ပြည်သူ့လွှတ်တော် (၁၃)ကြိမ်မြောက် ပုံမှန်အစည်းအဝေးအစနေ့မှာ ကြိုဆိုနှုတ်ခွန်းဆက်စကား ပြောကြားစဉ် ထည့်သွင်းပြောကြားခဲ့တာပါ။

ပြည်သူ့လွှတ်တော်ကိုယ်စားလှယ်တွေအနေနဲ့ မိမိတို့နိုင်ငံကို ကမ္ဘာ့ရေစီးကြောင်းမှာ လိုက်ပါပြောင်းလဲတိုးတက်နိုင်တဲ့ နိုင်ငံအဖြစ် ဖန်တီးပုံဖော်သွားကြရမှာ ဖြစ်ပါတယ်။ ဒီလိုဆောင်ရွက်တဲ့နေရာမှာ အဓိကကြုံတွေ့နေရတဲ့ အခက်အခဲကတော့ ပြည်တွင်းငြိမ်းချမ်းရေးရရှိဖို့ပဲဖြစ်ပါတယ်။ ဒီမိုကရေစီ ဖက်ဒရယ်ပြည်ထောင်စု တည်ထောင် နိုင်ဖို့အတွက် ထာဝရငြိမ်းချမ်းရေးရရှိရေးဟာ အရေးကြီးဆုံးမှတ်တိုင်တစ်ခုဖြစ်ပြီး ဒီမိုကရေစီ အခြေခံတဲ့ ဖက်ဒရယ်မူတွေရရှိဖို့ မိမိတို့အားလုံးဝိုင်းဝန်း ပံ့ပိုးပေးကြရမှာ ဖြစ်တယ်လို့ဆိုပါတယ်။ ဒါ့အပြင် ငြိမ်းချမ်းရေးလုပ်ငန်းစဉ်တွေ အောင်မြင်မှသာ မိမိတို့ရဲ့ နောင်လာနောက်သား မျိုးဆက်တွေကို ကောင်းမွန်တဲ့ အမွေထားခဲ့ပေးနိုင်မှာ ဖြစ်တယ်လို့ ပြည်သူ့လွှတ်တော်ဥက္ကဋ္ဌ ဦးတီခွန်မြတ်ကပြောပါတယ်။

ပြည်သူ့လွှတ်တော် ဥက္ကဋ္ဌ ဦးတီခွန်မြတ်က လွှတ်တော်ကိုယ်စားလှယ်တွေအနေနဲ့ လွှတ်တော်များရဲ့ အဓိကတာဝန်တွေဖြစ်တဲ့  ဥပဒေပြုရေးတာဝန်၊ စောင့်ကြည့်ထိန်းညှိခြင်းတာဝန်နဲ့ ကိုယ်စားပြုခြင်းတာဝန်တွေကို ကျေပွန်အောင် ထမ်းဆောင်သွားကြဖို့နဲ့ သက်ဆိုင်ရာ မဲဆန္ဒနယ်အတွက်သာမက ပြည်သူလူထုတစ်ရပ်လုံး အကျိုးစီးပွားဖွံ့ဖြိုး တိုးတက်အောင် ကြံဆောင်နိုင်ကြတဲ့ လွှတ်တော်ကိုယ်စားလှယ်များ ဖြစ်အောင် ဆောင်ရွက်ကြဖို့ တိုက်တွန်းပြောကြားခဲ့ပါတယ်။

ယခုစတင်ကျင်းပခဲ့တဲ့ (၁၃) ကြိမ်မြောက် ပုံမှန် အစည်းအဝေးကာလအတွင်းမှာ ဆွေးနွေးကြရမယ့် ဥပဒေကြမ်း (၁၄)ခုရှိပြီး အဆိုများအနေနဲ့ (၁၂) ကြိမ်မြောက် ပုံမှန်အစည်းအဝေး ကာလအတွင်းမှာ တင်သွင်းခဲ့ပြီး ဆွေးနွေးရန်ကျန်အဆို (၃)ခုနဲ့ ယခု အသင့်ဖြစ်အဆို (၁၂) ခု ရှိတဲ့အတွက် ဆွေးနွေးရန် အဆိုစုစုပေါင်း (၁၅) ခု ရှိကာ အသင့်ဖြစ် ကြယ်ပွင့်ပြမေးခွန်း (၁၀၉)ခု ရှိတယ်လို့ သိရပါတယ်။

 

 

Related News