သြဂုတ်လအတွင်း သတ်မှတ်ထားတဲ့ အာဟာရဖွံဖြိုးရေး ရက်သတ္တပတ်လှုပ်ရှားမှုတွေကို တစ်နိုင်ငံလုံးအတိုင်းအတာနဲ့ ဆောင်ရွက်မှာဖြစ်တယ်လို့ သြဂုတ်လ ၁၁ ရက်က Lotte ဟိုတယ်မှာ ပြုလုပ်တဲ့ ကမ္ဘာ့မိခင် နို့တိုက်ကျွေးရေး ရက်သတ္တပတ်ဗဟိုအဆင့်ဖွင့်ပွဲအခမ်းအနားမှ သိရပါတယ်။သြဂုတ်လပထမပတ်ကို မိခင်နို့စနစ်တကျ တိုက်ကျွေးရေး ရက်သတ္တပတ်အဖြစ် သတ်မှတ်ထားသလို၊ ဒုတိယပတ်ကို ကျောင်းကျန်းမာရေး ရက်သတ္တပတ်၊ တတိယပတ်ကို ကိုယ်ဝန်ဆောင်နှင့် နို့တိုက်မိခင်များ အာဟာရဖွံ့ဖြိုးရေး ရက်သတ္တပတ်နဲ့ စတုတ္ထပတ်ကိုတော့ အိုင်အိုဒင်းချို့တဲ့မှု ပပျောက်ရေး ရက်သတ္တပတ်တွေ အဖြစ် သတ်မှတ်ထားပြီး သြဂုတ်လတစ်လလုံး အဆိုပါလှုပ်ရှားမှုတွေကို တိုင်းဒေသကြီးနဲ့ပြည်နယ်အလိုက် ပြုလုပ်မှာဖြစ်ပါတယ်။

ဒီလို ကျန်းမာရေးအဖွဲ့အစည်းတွေရဲ့ ပညာပေးလှုပ်ရှားမှုတွေကို ကျန်းမာရေးနှင့်အားကစားဝန်ကြီးဌာနအပြင် ပြည်သူ့ကျန်းမာရေး ဦးစီးဌာနနဲ့ ပြည်သူတွေ ပူးပေါင်းပါဝင်ဖို့ လိုအပ်တယ်လို့ အာဟာရဖွံ့ဖြိုးရေးနှင့် သုတေသနဌာနခွဲရဲ့ ဒုတိယညွှန်ကြားရေးမှူးက ပြောပါတယ်။ကိုးနှစ်ကျော် ပြုလုပ်လာတဲ့ မြန်မာနိုင်ငံအတွင်း အာဟာရဖွံ့ဖြိုးရေးလှုပ်ရှားမှုတွေကို တစ်စိတ်တစ်ပိုင်းကူညီလာခဲ့တဲ့ 3MDG ရန်ပုံငွေအဖွဲ့ကလည်း ဒီလို လှုပ်ရှားမှုတွေက ပြည်သူတွေကြားထဲ ကျန်းမာရေးအသိပညာတွေ စိမ့်ဝင်အောင် ပညာပေးတဲ့ သဘောဖြစ်တယ်လို့ ပြောပါတယ်။

ကမ္ဘာ့မိခင် နို့တိုက်ကျွေးရေး ရက်သတ္တပတ်နှင့်  အာဟာရဖွံ့ဖြိုးရေး ရက်သတ္တပတ်လှုပ်ရှားမှုများ ဗဟိုအဆင့်ဖွင့်ပွဲ အခမ်းအနားမှာ ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက  ကျန်းမာရေးနှင့်အားကစားဝန်ကြီးဌာန အမြဲတမ်းအတွင်းဝန် ပါမောက္ခဒေါက်တာသက်ခိုင်ဝင်းတို့က အဖွင့်မှာစကားပြောကြားခဲ့ပါတယ်။ မိခင်နို့တိုက်ကျွေးရေး လှုပ်ရှားမှုတွေကို စက်တင်ဘာလပထမပတ်မှာ ဆောင်ရွက်ခဲ့ကြပေမယ့် ကမ္ဘာလုံးဆိုင်ရာ မိခင်နို့တိုက်ကျွေးရေး ရက်သတ္တပတ်က သြဂုတ်လပထမပတ်ထဲမှာ ဖြစ်တာကြောင့် ၂၀၀၉ ခုနှစ်ကစပြီး ပြောင်းလဲကျင်းပခဲ့တာပါ။

 

 

Related News