(၂၀၁၈)သြဂုတ်လ(၁)ရက်ထိ မြန်မာနိုင်ငံရဲ့ကုန်သွယ်မှုပမာဏဟာ အမေရိကန်ဒေါ်လာသန်း(၁၃၀၀၀) ကျော်ရှိပြီး ဒီထဲမှာ ပုဂ္ဂလိကကုန်သွယ်မှုဟာ(၈၅)ရာခိုင်နှုန်းကျော်ပါဝင်နေတယ်လို့ သြဂုတ်လ(၂၄)ရက်က UMFCCI မှာပြုလုပ်တဲ့ ပုဂ္ဂလိက ကဏ္ဍဖွံ့ဖြိုးတိုးတက်ရေးအတွက် ဒုတိယသမ္မတနဲ့ မြန်မာ့စီးပွားရေးလုပ်ငန်းရှင်တွေ ပုံမှန်တွေဆုံပွဲမှာ ဒုတိယသမ္မတဦးမြင့်ဆွေက ပြောကြားခဲ့ပါတယ်။ (၂၀၁၈)ဧပြီ(၁)ရက်မှ သြဂုတ်(၁)ရက်ထိ (၄)လအတွင်း ကုန်သွယ်မှုပမာဏဟာ အမေရိကန်ဒေါ်လာသန်း(၁၃၀၀၀)ကျော်ရှိပြီး ပြီးခဲ့တဲ့နှစ်ကာလတူနဲ့ နှိုင်းယှဉ်ရင် သန်း(၁၆၀၀)ကျော်ပိုလာတယ်လို့သိရပါတယ်။

ဒီထဲမှာပုဂ္ဂလိကကဏ္ဍကုန်သွယ်မှုဟာ အမေရိကန်ဒေါ်လာသန်း(၁၁၀၀၀)ကျော်ပါဝင်နေတာဖြစ်ပြီး (၈၅) ရာခိုင်နှုန်းကျော်ရှိနေတာပါ။ နိုင်ငံအနေနဲ့ကုန်သွယ်မှုကဏ္ဍမှာ ပြည်ပပို့ကုန်ကနည်းနေပြီး သွင်းကုန်က များနေလို့ စည်းကမ်းတကျနဲ့ပြည်ပကိုပို့ကုန်တွေတင်ပို့နိုင်အောင် လုပ်ဆောင်ဖို့ကိုလည်း တိုက်တွန်းမှာကြား ခဲ့သလို သွင်းကုန်တွေကို မဖြစ်မနေသုံးစွဲရမယ့် ပစ္စည်းတွေကို တင်သွင်းကြဖို့ ဒုတိယသမ္မတက မှာကြားခဲ့ပါတယ်။ 

ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် ဒုတိယသမ္မတနဲ့ မြန်မာ့စီးပွားရေးလုပ်ငန်းရှင်တွေ ပုံမှန်တွေဆုံပွဲကို ၂၀၁၆ ဒီဇင်ဘာလ ကတည်းကနေ စပြီးလုပ်လာခဲ့တာဟာ ခုဆို (၁၉)ကြိမ်ရှိပြီဖြစ်ပါတယ်။ ပြီးခဲ့တဲ့ (၁၈)ကြိမ်မြောက် တွေ့ဆုံဆွေးနွေးပွဲအထိတော့ လုပ်ငန်းရှင်တွေရဲ့ အကြံပြုချက်(၂၁၆)ချက်ရှိခဲ့ပြီး ဖြေရှင်းပေးနေတယ်လို့လည်းသိရပါတယ်။ ခုတွေ့ဆုံပွဲမှာ နိုင်ငံခြားငွေလဲလှယ်နှုန်းကိစ္စနဲ့ အခွန်ဆိုင်ရာကိစ္စရပ်တွေ ကုန်သည်စက်မှုအသင်းချုပ်က အကြံပြုဆွေးနွေးတာ၊ ရခိုင်ပြည်နယ်နဲ့ ကချင်ပြည်နယ် ကုန်သည် နှင့်စက်မှုလက်မှုလုပ်ငန်းရှင်များအသင်းတွေက ဒေသရဲ့လုပ်ငန်းတွေအခြေအနေ တွေကို ဆွေးနွေးခဲ့ကြတာဖြစ်ပါတယ်။ ပြည်ပကုန်သွယ်မှုနဲ့ပတ်သက်လို့ ပြီးခဲ့တဲ့(၂၀၁၇-၂၀၁၈)ဘဏ္ဍာနှစ်မှာ အမေရိကန်ဒေါ်လာသန်း(၃၃၀၀၀) ကျော် ရှိခဲ့ပြီး ဒီထဲမှာ ပုဂ္ဂလိက ကဏ္ဍကုန်သွယ်မှုက (၈၁)ရာခိုင်နှုန်းထိပါဝင်ခဲ့တယ်လို့လည်းသိရပါတယ်။ 

 

 

 

Related News