ကတ်တလိုးနီးယားဒေသရဲ့အမျိုးသားနေ့မှာ စပိန်နိုင်ငံကနေခွဲထွက်ဖို့ လိုလား နေသေးတယ်လို့ ဒေသခံတစ်သန်းနီးပါးက ဆန္ဒထုတ်ဖော်ခဲ့ပါတယ်။ စပိန်နိုင်ငံအရှေ့မြောက်ပိုင်းက “ကတ်တလိုနီးယား”ကိုယ်ပိုင်အုပ်ချုပ်ခွင့်ရဒေသရဲ့မြို့တော်“ဘာစီလိုနာ”မှာ အမျိုးသားနေ့ အထိမ်းအမှတ်အဖြစ် စက်တင်ဘာလ(၁၁)ရက်က လူတစ်သန်းလောက်စုရုံးခဲ့ကြပြီး စပိန်နိုင်ငံကနေ ခွဲထွက်လိုသေးတယ် ဆိုတာကို ဆန္ဒထုတ်ဖော်ခဲ့ပါတယ်။ ပြီးခဲ့တဲ့(၂၀၁၇)ခုနှစ်၊ အောက်တိုဘာလမှာ စပိန်နိုင်ငံကနေခွဲထွက်ဖို့ လှုပ်ရှားမှုတွေ နောက်ပိုင်းမှာ ကတ်တလိုးနီးယားအမျိုးသားနေ့ကျင်းပတာ ပထမဆုံးအကြိမ်ဖြစ်ပါတယ်။

အခုနှစ်အခမ်းအနားမှာ ဆန္ဒ ထုတ်ဖော်ကြဖို့ ဒေသခံတွေကို ခွဲထွက်ရေးကြိုးပမ်းမှုတွေမအောင်မြင်ခဲ့တဲ့နောက်ပိုင်း ဘယ်လ်ဂျီယံနိုင်ငံကိုထွက်ပြေးခဲ့တဲ့ ကတ်တလန်သမ္မတဟောင်း “ကားလ်စ် ပူဒေးမွန့်တ်”နဲ့ ကတ်တလန်လက်ရှိသမ္မတ “ကွင်မ် တော်ရာ”တို့က အစောပိုင်းမှာ တိုက်တွန်းခဲ့ပါတယ်။ အဆုံးမဲ့ချီ တက်မှုတစ်ရပ်ကိုစတင်နေပြီလို့ အခမ်းအနားအပြီးမှာ ကွင်မ်တော်ရာကပြောပါတယ်။ ခွဲထွက်ရေးအတွက် လူထုဆန္ဒခံယူခဲ့တဲ့ နေ့နဲ့ ခွဲထွက်ခဲ့ပြီလို့တစ်ဖက်သတ်ကြေညာခဲ့တဲ့နေ့တွေမှာလည်း ဆန္ဒထုတ်ဖော်တာ တွေဆက်လုပ်ဖို့ ဒေသခံတွေကစီစဉ်နေပါ တယ်။ အဲဒီလိုခွဲထွက်တာက စပိန်နိုင်ငံရဲ့ဖွဲ့စည်းပုံအခြေခံဥပဒေနဲ့ မညီညွတ်ဘူးလို့ စပိန်ဖွဲ့စည်းပုံအခြေခံဆိုင်ရာတရားရုံးက (၂၀၁၇)ခုနှစ်မှာ ဆုံးဖြတ်ခဲ့ပြီး ကတ်တလိုးနီးယားဒေသကို စပိန်အစိုးရက တိုက်ရိုက် အုပ်ချုပ်ခဲ့ပါတယ်။

 

 

Related News