မြန်မာနိုင်ငံအင်ဂျင်နီယာအသင်းနဲ့ မြန်မာမော်တာကော်ပရေးရှင်းတို့ပူးပေါင်းပြီး အခြေခံမော်တော်ယာဉ်စက်ပြင်သင်တန်းနဲ့ အဆင့်မြင့်မော်တော်ယာဉ်စက်ပြင်သင်တန်း ကို စက်တင်ဘာလ(၃)ရက်ကစတင်ပြီး(၂)လကြာ တောင်ဥက္ကလာမြို့နယ်ရှိ Sakura Car Showroom မှာ ဖွင့်လှစ်သင်ကြားပေးနေပါတယ်။ 

အခြေခံမော်တော်ယာဉ်စက်ပြင်သင်တန်းမှာ ကားစက်ပစ္စည်းတွေနဲ့ပတ်သက်တဲ့ အကြောင်းအရာမျိုးစုံကို စာတွေ့သင်ကြားပေးနေပြီး လက်တွေ့ပိုင်းကိုတော့ ကားတစ်စီးလုံးကိုဖြုတ်ပြီး အင်ဂျင်တစ်လုံးစီရဲ့ ပြုပြင်နည်းတွေကိုပါ သင်ကြားပေးနေတာဖြစ်ပါတယ်။ အဆင့်မြင့်မော်တော်ယာဉ်စက်ပြင်သင်တန်းမှာတော့ သင်တန်းသားတွေကို Electronic Control System တွေနဲ့ပတ်သက်တဲ့နည်းပညာတွေအပါအ၀င် ကားတစ်စီးမှာ ပါဝင်ရမယ့်ပစ္စည်းတွေအကြောင်းကို စာတွေ့လက်တွေ့ သင်ကြားပေးနေတာဖြစ်ပါတယ်။ အဆင့်မြင့်မော်တော်ယာဉ်စက်ပြင်သင်တန်းကို တစ်ပတ်ကို(၅)ရက်သင်ကြားပေးပြီး အခြေခံမော်တော်ယာဉ်စက်ပြင်သင်တန်းကိုတော့ တစ်ပတ်ကို(၆)ရက်သင်ကြားပေးနေတာဖြစ်ပါတယ်။

သင်တန်းသားတွေထဲက အခြေခံမော်တော်ယာဉ်ပြုပြင်နည်းတွေကို အပြင်သင်တန်းတွေမှာတက်ရောက်ခဲ့ပြီးသူတွေကတော့ အဆင့်မြင့်မော်တော်ယာဉ်စက်ပြင်သင်တန်းကို တိုက်ရိုက်တက်ရောက်ခွင့်ရရှိတယ်လို့သိရပါတယ်။ ဒီသင်တန်းမှာ အခြေခံသင်တန်း တက်ရောက်သူတွေကတော့ အဆင့်မြင့်သင်တန်းကို ထပ်မံတက်ရောက်ကြရမှာဖြစ်ပြီး  သင်တန်းကာလနှစ်ခုစလုံးပြီးဆုံးရင် မိမိတို့စိတ်ဝင်စားကြတဲ့ ကားပြင်ဆင်ရေးဌာနတွေမှာ ၀င်ရောက်လုပ်ကိုင်ကြမယ်လို့ပြောပါတယ်။

မော်တော်ယာဉ်စက်ပြင်သင်တန်းကို (၂၀၁၄)ခုနှစ်က စတင်ဖွင့်လှစ်သင်ကြားပေးခဲ့တာဖြစ်ပြီး လက်ရှိမှာသင်တန်းသား(၁၁၂၆)ဦးကို သင်ကြားပို့ချခဲ့ပြီးဖြစ်တယ်လို့ သိရပါတယ်။ သင်တန်းကို ပြည်နယ်နှင့်တိုင်းဒေသကြီးတွေအပါအ၀င် နယ်စပ်ဒေသတွေကပါ လာတက်ရောက်ကြတယ်လို့သိရပါတယ်။

 

 

 

Related News